Almenni-Lífsverk lífeyrissjóður
Framvinda sameiningar
Upplýsingar um framkvæmd sameiningar Lífsverks og Almenna
Febrúar 2026
Sjóðfélagafundir Lífsverks lífeyrissjóðs og Almenna lífeyrissjóðsins samþykktu í nóvember 2025 tillögu stjórna um að sameina sjóðina í ársbyrjun 2026. Undirbúningur stendur yfir en búast má við að sameiningarverkefni standi yfir á fyrri hluta árs 2026.
Efnisyfirlit
Samrunaferli og formleg staðfesting
Eftir að sjóðfélagar samþykktu sameiningu Lífsverks og Almenna hófst formlegt samþykktarferli með tilkynningu til Samkeppniseftirlitsins og beiðni um staðfestingu Fjármála- og efnahagsráðuneytis á breytingum á samþykktum sjóðanna. Fjármála- og efnahagsráðuneytið hefur staðfest samþykktir sjóðanna og má nálgast þær á heimasíðu sjóðsins. Samkeppniseftirlitið hefur einnig lokið athugun sinni, án íhlutunar.
Sameinaður lífeyrissjóður hefur því formlega hafið störf og nafni sjóðsins og stjórn verið breytt í Fyrirtækjaskrá til samræmis.
Almenni-Lífsverk lífeyrissjóður hefur formlega starfsemi þann 1. janúar 2026.
Flutt réttindi og lífeyrisgreiðslur í janúar
Við samruna Lífsverks og Almenna verða áunnin réttindi sjóðfélaga Lífsverks flutt í sameinaðan sjóð og haldast óbreytt til framtíðar í samræmi við tryggingafræðilega stöðu á hverjum tíma. Með áunnum réttindum er átt við réttindi sem hafa áunnist fyrir greidd iðgjöld árið 2025 og fyrr.
Framtíðarréttindi vegna iðgjalda ársins 2026 og síðar ávinnast samkvæmt samþykktum Almenna – Lífsverks, sameinaðs sjóðs.
Það mun taka nokkurn tíma að birta flutt réttindi í Lífsverki á sjóðfélagavef sameinaðs sjóðs en þangað til verða upplýsingar um áunnin réttindi áfram aðgengilegar á sjóðfélagavef Lífsverks. Sjóðfélagar verða upplýstir þegar upplýsingar um réttindi og inneign verða aðgengilegar á sjóðfélagavef Almenna - Lífsverks.
Lífeyrisgreiðslur
Almenni – Lífsverk, sameinaður sjóður greiðir lífeyri í byrjun mánaðar (fyrir fram) í samræmi við samþykktir.
Lífeyrisþegar Lífsverks, sem áður fengu greiddan lífeyri í lok mánaðar, munu því fá lífeyri greiddan í lok desember og svo aftur í byrjun janúar. Framvegis verður lífeyrir hvers mánaðar greiddur fyrir fram eða í byrjun mánaðar.
Inneign í séreignarsjóði
Eignir Lífsverks og Almenna verða sameinaðar um miðjan janúar eftir að eignamat um áramót liggur fyrir. Í kjölfarið verða séreignareikningar sjóðfélaga Lífsverks fluttir í sameinaðan sjóð og upplýsingar verða aðgengilegar á sjóðfélagavef Almenna-Lífsverks.
Fram að því eru upplýsingar um inneign aðgengilegar á sjóðfélagavef Lífsverks. Athugið að inneign sjóðfélaga sem hafa haft úttekt og fengu greiðslu í janúar uppfærist ekki vegna þeirrar greiðslu.
Greiðsla iðgjalda
Hægt verður að greiða iðgjöld fyrir árið 2025 fyrir sjóðfélaga Lífsverks með óbreyttum hætti til 1. febrúar 2026. Eftir það verður öllum iðgjaldagreiðslum beint til Almenna-Lífsverks samkvæmt greiðsluupplýsingum hér fyrir neðan.
Launagreiðendur skulu skila iðgjöldum fyrir árið 2026 til Almenna-Lífsverks. Breyta þarf ráðstöfun iðgjalda sjóðfélaga Lífsverks í launakerfum og greiðslum á iðgjaldareikning.
XML upplýsingar
- Lágmarksiðgjöld: L005
- Viðbótariðgjöld: X004
- Endurhæfingarsjóður: R005
Iðgjaldareikningur
Rafræn skil iðgjalda
Launagreiðendur geta skilað iðgjöldum á nokkra vegu til sjóðsins. Mælt er með að þeir nýti sér rafræn skil, annað hvort með því að senda skilagreinar beint úr launakerfi eða með því að skrá skilagreinar í gegnum launagreiðendavef sem er aðgengilegur á heimasíðu sjóðsins, www.almenni-lifsverk.is. Einnig er hægt að fylla út rafræna skilagrein á opnum vef.
Kynningarfundir
Kynningarfundur 27. janúar kl. 17.00
Hilton Nordica, Reykjavík
Almenni-Lífsverk bauð sjóðfélögum á kynningarfund um sameininguna. Á fundinum var sérstök kynning á ávöxtunarleiðum séreignarsjóðs og farið yfir flutt- og framtíðarréttindi í sameinuðum samtryggingarsjóði.
Fundurinn var vel sóttur.
Smelltu hér til að horfa á upptöku frá fundinum.Fundir með ráðgjafa
Heimasíða Lífsverks verður opin á meðan þurfa þykir til að tryggja aðgang að sjóðfélagavef en einnig verður hægt að komast inn á sjóðfélagavef Lífsverks undir mínar síður á heimasíðu sameinaðs sjóðs www.almenni-lifsverk.is. Sjóðfélögum sem vilja nánari upplýsingar er bent á að þeir eru velkomnir á skrifstofu sjóðsins til að hitta ráðgjafa. Ráðgjöf hjá Almenna – Lífsverki er að kostnaðarlausu og án skuldbindinga. Mælt er með að fólk panti tíma á vefsíðu sjóðsins.
Umbreyting réttinda í séreign
Sjóðfélagar Lífsverks lífeyrissjóðs hafa tímabundna heimild frá 1. janúar til 30. júní 2026 til að umbreyta 15% af áunnum ellilífeyrisréttindum í inneign í séreignarsjóði hjá Almenna – Lífsverk.
Heimildin miðast við stöðu áunninna ellilífeyrisréttinda vegna iðgjalda ársins 2025 og fyrr, á verðlagi þann 1. júlí 2026. Umbreytingin verður framkvæmd í byrjun júlí. Við umbreytinguna lækka áunnin ellilífeyrisréttindi sjóðfélaga, og þar með ellilífeyrisgreiðslur úr samtryggingardeild, um 15%, en á móti eignast sjóðfélagar samsvarandi inneign í séreignarsjóði. Rétt er að árétta að umbreytingin tekur einungis til ellilífeyrisréttinda og að sjóðfélagar halda óbreyttum réttindum til örorku-, maka- og barnalífeyris.
Athugið
Heimildin nær ekki til örorku- eða makalífeyrisþega eða þeirra sem höfðu byrjað töku ellilífeyris á árinu 2025 eða fyrr. Stjórn Lífsverks gaf vilyrði fyrir því að leggja fram breytingatillögu á aðalfundi sjóðsins vorið 2026 um að útvíkka heimildina til ellilífeyrisþega, ef frekari skoðun leiðir í ljós að slíkt væri mögulegt.
Athugun á því stendur yfir og verða ellilífeyrisþegar látnir vita þegar frekari upplýsingar liggja fyrir.
Umsókn og reiknivél
Umsókn um umbreytingu lífeyrisréttinda verður aðgengileg á heimasíðu Almenna – Lífsverks í byrjun janúar.
Þeim sjóðfélögum sem hyggjast fara á lífeyri fljótlega en vilja nýta sér þessa heimild er bent á að heimildin verður í boði frá 1. janúar til 30. júní 2026 óháð því hvenær þeir sækja um lífeyri.
Sameining ávöxtunarleiða í séreignarsjóðum
Við samruna Lífsverks lífeyrissjóðs og Almenna lífeyrissjóðsins munu ávöxtunarleiðir séreignarsjóðs Lífsverks sameinast leiðum í séreignarsjóði Almenna – Lífsverks.
Sameiningin hefur nokkur áhrif á eignasamsetningu sjóðfélaga í ávöxtunarleiðum beggja sjóða. Fyrir sjóðfélaga í Lífsverki 1 og 2 eykst vægi erlendra hlutabréfa á kostnað innlendra og samsetning skuldabréfa breytist. Breytingin er minni fyrir sjóðfélaga Almenna en þó breytist samsetning hlutabréfa í Ævisafni III.
Sjóðfélögum verður jafnframt heimilt að færa inneign, að hluta eða í heild, milli annarra ávöxtunarleiða sameinaðs sjóðs eða í Ævileiðina án kostnaðar allt til 30. júní 2026. Veldu viðeigandi hnapp eftir því hvort þú áttir inneign hjá Almenna eða Lífsverki þann 31.12.2025.
Eignasamsetning eftir sameiningu
Breyting fyrir sjóðfélaga
Þar sem Lífsverk 1 vegur tiltölulega lítið af heildarstærð Ævisafns II eftir sameiningu mun eignasamsetning sjóðfélaga í Ævisafni II breytast lítið. Sameiningin hefur því óveruleg áhrif á sjóðfélaga Almenna.
Eignasamsetning breytist hins vegar nokkuð fyrir sjóðfélaga Lífsverks. Vægi erlendra hlutabréfa vex á kostnað innlendra og samsetning skuldabréfa breytist.
Byggir á upplýsingum um eignir beggja sjóða m.v. 30. september 2025.
Eignasamsetning eftir sameiningu
Breyting fyrir sjóðfélaga
Eignasamsetning Ævisafns III breytist nokkuð með hærra vægi innlendra hlutabréfa og breyttri samsetningu skuldabréfa. Hjá Lífsverki verða meiri breytingar: Vægi erlendra hlutabréfa eykst, innlendra minnkar og samsetning skuldabréfa breytist.
Önnur skuldabréf eru í stærðarröð: Veðtryggð skuldabréf fasteignafélaga, sértryggð skuldabréf banka, skuldabréf orkufyrirtækja, sveitarfélaga, fyrirtækja og annarra útgefenda.
Byggir á upplýsingum um eignir beggja sjóða m.v. 30. september 2025.
Eignasamsetning eftir sameiningu
Breyting fyrir sjóðfélaga
Hjá sjóðfélögum Almenna eykst vægi annarra skuldabréfa og innlána. Hjá sjóðfélögum Lífsverks hækkar vægi veðskuldabréfa og vægi ríkisskuldabréfa lækkar.
Önnur skuldabréf eru í stærðarröð: Veðtryggð skuldabréf fasteignafélaga, sértryggð skuldabréf banka, skuldabréf orkufyrirtækja, sveitarfélaga, fyrirtækja og annarra útgefenda.
Byggir á upplýsingum um eignir beggja sjóða m.v. 30. september 2025.
Sjö ávöxtunarleiðir í boði
Sjóðfélagar geta valið á milli sjö ávöxtunarleiða og Ævileiðarinnar þar sem inneign færist milli safna eftir aldri.
Ávöxtunarleiðirnar verða kynntar sjóðfélögum á sérstökum fundi þann 27. janúar. Sjóðfélagar geta lesið um ávöxtunarleiðir á heimasíðu sjóðsins hér.
Aldurstengdar ávöxtunarleiðir
Ævisöfn I, II og III eru blönduð verðbréfasöfn með skuldabréfum, hlutabréfum og innlánum. Eignasamsetning safnanna er mismunandi og sjóðfélögum ráðlagt að greiða í söfnin eftir aldri þannig að vægi skuldabréfa aukist með aldrinum. Í Ævileiðinni er inneign flutt milli ævisafnanna eftir aldri.
Aðrar ávöxtunarleiðir
- Erlenda verðbréfasafnið fjárfestir um 70% í erlendum hlutabréfum og um 30% í erlendum skuldabréfum.
- Ríkissafnið fjárfestir í ríkisskuldabréfum og innlánum.
- Innlánasafnið fjárfestir eingöngu í innlánum.
- Skuldabréfasafnið fjárfestir í vel dreifðu innlendu skuldabréfasafni.
Lán til sjóðfélaga
Almenni-Lífsverk vinnur að endurskoðun lánareglna með hliðsjón af reglum beggja eldri sjóða. Nýjar reglur verða kynntar um mánaðamót febrúar og mars. Þangað til gilda lánareglur Almenna lífeyrissjóðsins.
Í boði eru verðtryggð og óverðtryggð lán. Vextir eru annaðhvort festir til 36 mánaða og breytilegir eftir það, eða verðtryggðir fastir vextir út lánstímann.
Skilyrði fyrir lánsrétti
- Umsækjendur þurfa að vera virkir sjóðfélagar sem hafa greitt lágmarksiðgjöld í a.m.k. 6 af síðustu 12 mánuðum eða viðbótariðgjald í 24 af síðustu 30 mánuðum í annan hvorn sjóðinn eða báða.
- Fyrstu fasteignakaupendur öðlast lánsrétt við upphaf iðgjaldagreiðslna.
- Lífeyrisþegar geta átt lánsrétt hafi hann verið til staðar við upphaf lífeyristöku.
Veðhlutföll og hámarkslán
- Hámarksveðhlutfall á 1. veðrétti er 70% og samtals 60% á síðari veðréttum.
- Hámarkslánsfjárhæð fyrir einstaklinga er 70 milljónir, en fyrir pör sem bæði eru sjóðfélagar 80 milljónir.
- Fyrstu kaupendur geta fengið viðbótarlán í samfelldri veðröð upp í 85% veðhlutfall, með 0,75% vaxtaálagi.
- Hámarkslán fyrstu fasteignakaupenda með viðbótarláni er 60 m.kr.
Sótt er um lán á sérstökum lánavef þar sem jafnframt er hægt að fylgjast með afgreiðslu umsókna.
Skrifstofa og samskipti
Staðsetning
Skrifstofa sameinaðs sjóðs, Almenna-Lífsverks, verður á Dalvegi 30, 2. hæð, 201 Kópavogi.
Þar er góð aðstaða til að taka á móti sjóðfélögum í ráðgjöf eða á fræðslufundi.
Samskipti
Þeim sem vilja nánari upplýsingar er bent á að senda fyrirspurnir á netfang sjóðsins eða hafa samband við skrifstofu sjóðsins.
almenni-lifsverk@almenni-lifsverk.is